Adimen urritasuna duten pertsonen mailako lehia izango da gehien iraungo duena: sei jardunaldi izango ditu. Bihar, martxoaren 6an jokatuko da lehena, eta ekainaren 26an amaituko dute lehia. Ortegaren multzoak, ordea, lau jardunaldi jokatuko ditu: martxoaren 13an eta 20an, maiatzaren 15ean eta ekainaren 26an. Azken jardunaldi horretan sari-banaketa izango da.
Gurpildun aulkiko buruz buruko txapelketa ere bihar hasiko da Usurbilen eta lau jardunaldi izango ditu. Horietako bat Lasarte-Orian jokatuko da. Bikotekako txapelketa, berriz, martxan jarriko den azkena izango da. Ekainaren 5ean eta 12an jokatuko dituzte jardunaldiak eta ekainaren 26an, Zumaian, final handien jardunaldia izango da.