Bartzelonan lehiatu da asteburuan Buruntzaldea IKTko Nahia Zudaire. Bartzelonako Igeriketa egokitutako nazioarteko sarian Euskadiko selekzioarekin parte hartu du hiru probetan: 200 m. eta 400 m. libre eta 100 m. tximeleta. Hiru probetan lehenen artean ibili zen arren, azpimarragarria da 400 m. libreetan egindako lana.
Larunbatean 400 m. libre proba jokatu zuen igerilari gazteak. Bigarren postuan amaitu zuen 5:06,21 denbora egin eta bere marka onduz. Sari bikoitza ere izan zen Buruntzaldea IKTko igerilariarentzat S8 mailako Espainiako errekorra ezarri eta Tokioko Joko Paralinpikoetarako gutxieneko B marka lortu baitzuen.
Igandean, berriz, 200 m. libre eta 100 m. tximeleta probetan lehiatu zen. Goizeko sailkapen probak gainditu eta finaletan izan zen. Tximeletako proban bigarren sailkatu zen 1:24,39 markarekin eta estilo libreko proban, berriz, hirugarren izan zen 2:31,68an kronoa geldituaz.
Tokiorako bidean
Gutxieneko B marka horrek ez dio plaza olinpikoa ziurtatzen, baina A marka lortzen dutenen plazak betetzen ez badira aukerak ditu Zudairek Tokion egoteko. Espainiako paralinpiar taldeak 24 igerilari eraman ahalko ditu Tokiora; hamabost gizonezko eta bederatzi emakumezko. Egun bost igerilarik bakarrik dituzte A markak eta bederatzik, berri, B markaren bat, Zudaire horien artean.
Buruntzaldea IKTko prestatzaile Borja Apeztegiak adierazi duenez, "helbururik handiena erdietsi du Nahiak. Lortutakoa oso handia da eta eta oraindik ere gauza handiagoak lortu ditzakeela ziur gaude. Orain arte bezela pausoz pauso eta lasaitasunez jarraitzen badu". Eta bide horretan jarraitzeko taldearen animoak dituela nabarmendu du.