COVID-19

Lasarte-Orian sei kasu atzeman dituzte astelehenean

Txintxarri Aldizkaria 2020ko aza. 17a, 13:54

Eusko Jaurlaritzako Osasun Sailaren datuen arabera, Lasarte-Orian beste sei kasu atzeman dituzte azaroaren 16an. Hilabetea hasi zenetik 198 positibo detektatu dituzte gure herrian, urri osoan baino hogei gutxiago. 

Beterri-Buruntza eskualdeko udalerrietan kasuak zenbatzen jarraitu dute astelehenean zehar, baina koronabirusaren intzidentzia altuagoa da herri batzuetan besteetan baino. Andoainen 13 kasu atzeman dituzte astelehenean; Lasarte-Orian, sei; Hernanin, lau; Astigarragan, bi; Usurbilen, bat; eta Urnietan bakar bat ere ez. Bi egun daramatzate herri horretan kutsatze berririk atzeman gabe.

EAEko hiru lurralde historikoetan 941 positibo detektatu dituzte azaroaren 16an, horietatik 411 Gipuzkoan. Kutsatze berriak atzemateko PCR probak eta antigenoen test azkarrak egiten ari dira Osakidetzako beharginak. Astelehenean egin dituzten probetatik %8,9 dira positiboak.

Paziente gutxiago egon dira ospitaleratuta koronabirusagatik astelehenean igandean baino: 483, bezperan baino 33 gutxiago. ZIU Zainketa Intentsiboen Unitateetan bezperan baino lau pertsona gutxiago oheratuta egon dira Osakidetzaren zentroetan; 141 denera.

Erlazionatuak

Bideo-pilulak: talde immunitatea

Elhuyar/Teknopolis 2020 aza 17 Gizartea