Usoak elikatzeak dakartzan eragozpenak gogoratzeko bandoa

Arg.: Lasarte-Oriako Udala.

Lasarte-Oriako Udalak herritarren laguntza eskatu du eta bide publikoetan animalientzako elikagairik ezin daitekeela utzi gogorarazten du

Usoen populazio kontrolatu gabeak bide publikoan eragiten ari diren eragozpenak direla-eta, bandoa jarri du Lasarte-Oriako etxebizitzetan.

Udalak eragozpenez gain, osasungarritasun eta higienearen aldetik arazo handia direla nabarmantzen du.

"Usoen populazioa janariaren eskuragarritasunarekiko proportzionala da, eta hiri-inguruneko usoak zaborrez eta elikagai-hondakinez elikatzen dira, horiek garatzea eta ugaltzea ahalbidetzen baitute, eta, beraz, ez da beharrezkoa auzotar batzuek ematen dieten elikadura".

Horregatik, hegazti horien kontrolik gabe ugaltzea saihesteko eta bizilagunei sortzen dizkieten arazoak saihesteko herritarrei laguntza eskatzen die.

Era berean, Herritarren Bizikidetza eta Bide Publikoaren Erabilera eta Garbiketa arautzen dituen Udal Ordenantzaren 5. artikuluaren arabera, bide publikoan animalientzako elikagairik ezin dela utzi gogorarazten du eta udaltzainak udal-ordenantza hori behar bezala betearazteaz arduratuko direla ohartarazten du.