Abendura bitarteko saioak ostegun arratsaldeetan egingo dituzte Irakurle Txokokoek. Urtea amaitu bitarte hiru saio antolatu dituzte, 18:30etik aurrera:
- Urriaren 22an, Miren Amurizaren Basa eleberriaz jardungo dira. Idazlea bera saiora etorriko da.
- Azaroaren 19an, Nik kantatu eta dantza egiten du mendiak eleberria aztertuko dute, Irene Solarena.
- Abenduaren 10ean, Maddi Ane Txoperenak idatzitako Ene baitan bizi da lana izango dute hizpide. Idazlea gonbidatuko dute.
Errifak eta bertso afari literarioa
Irakurle Txokoak jakinarazi du errifak salduko dituela ikasturte honetan, 2 euroan, egitaraua osatzeko finantzazioa lortzeko. Izan ere, COVID-19a dela eta, ezin izan dute urteroko txozna jarri sanpedroetan. Ogitartekoak saldu ohi dituzte bertan. Saria "berezia" izango dela aurreratu dute: Txakur Gorriak propio Irakurle Txokoarentzat egindako artelan segida bateko lau lamina, hain justu. Zozketa abenduaren 10eko saioan egingo dute, eta une horretan bertan jakinaraziko dituzte lau zenbaki sarituak.
Ikasturtean zehar ekintza gehiago antolatzen ditu Irakurle Txokoak. Otsail partean, esate baterako, bertso afari literarioa. Betiko formatuan antolatzeko arazoak izango dituztela aurreikusten dute egitasmoko kideek. Zehaztu dute ekitaldia "beste formatu batean" egiteko aukerak aztertzen ari direla, eta "ahalegin guztiak" egingo dituztela bertso afariari jarraipena emateko. Aurrerago jakinaraziko dute zer eta noiz egingo duten.