"Parte-hartzean oinarritutako enpresen ekosistema bat" sortzeko helburuz abiatu zuten Beterri Saretuz programa eskualdeko hainbat enpresa eta eragilek iaz, Gipuzkoako Foru Aldundiaren eta Beterri-Buruntzako udalen laguntzarekin. Pasa dira hilabete batzuk ordutik, eta zenbait urrats egin dituzte bidean: 2019ko azaroaren 7an Orona-Ideon elkartu ziren esperientziak ezagutarazteko; aurten, otsailaren 13an, tailer batzuk egin zituzten, parte-hartzea bultzatzeko gakoak identifikatzeko.
Hirugarren jardunaldia ostegun honetan egingo dute, urriak 8, Hernaniko Biteri kultur etxean, 09:30etik 12:30era. Saioaren aurreneko zatian egitasmoa hasi zenetik hona egindako lana aurkeztuko dute gida formatuan. "Hainbat balio eraldatzaile eta ideietan oinarritutako materiala" sortu dute, "parte-hartzea sustatzeko lagungarri izan daitekeelakoan eta egindako lanaren aitortza gisa".
Azken hilabeteetako erronka eta bizipenak
Enpresa horiek COVID-19ari nola aurre egin dioten aztertuko dute jardunaldiaren bigarren zatian. Hartu behar izan dituzten erabakiez eta izandako bizipenez jardungo dira. Pandemiak azalarazitako krisi desberdinei aurre egiteko proiektu parte-hartzaile horrek izan dezakeen baliagarritasunaz ere solastuko dira.