Sasoetako auzoko festen argazkirik ez da egon aurten, Sasoeta Sasoian elkarteak bertan behera uztea erabaki duelako, COVID-19ak eragindako egoera tarteko. Dena den, ekitaldi sinboliko bat egin dute Jaizkibel plazako Marbell ile-apaindegiaren atarian: bandera berria aurkeztu du auzo elkarteak.
Marbell ile-apaindegiaren jabe Marimar Palaciosek oroigarri bat jaso du auzo elkartearen izenean. Santi senarra aurten zendu da; bera zen auzoko festetan urtero egiten duten danborradako "arima", elkarteko kideek azpimarratu dutenez. Oso eskertuta jaso du aitortza Palaciosek.