Zaporeak Proiektuak Euskal Herri osoan barrena zabaldu du Morian bizi diren errefuxiatuentzat janaria biltzeko deia, eta herritarrak erantzuten ari dira. Lasarte-Orian, bost taberna arduratu dira mota desberdinetako eligaiak bildu eta bidaltzeaz: Jalgi Kafe Antzokia, Furia Beltza, Avenida, Oreka eta Tiburtzio Artizar. 1.200 kilo pasatxo kargatu dituzte furgonetan; Astigarragara eraman dituzte kaxak.
Bost establezimendu horietara eraman dituzte arroza, pasta, olioa, atuna eta bestelakoak lasarte-oriatarrek. Horrez gain, Super BM eta Eroski supermerkatuek ere lagundu dute eta zenbait kutxa bete.
Irailaren 23tik 27ra bitartean bildu dute janaria tabernek. Egitasmoa egun pare bat lehenago bururatu zitzaien. Herritarren erantzuna, beraz, ozena izan da. "Oso eskertuta gaude", adierazi dute tabernariek.