COVID-19

Hamasei kasu erregistratu dituzte Lasarte-Orian azken hiru egunetan

Loidi-Barren pilotalekuan egiten ari dira PCR probak. Argazkia: Isaac Farre Rico.

Eusko Jaurlaritzaren Osasun Sailak emandako datuen arabera, hamasei kutsatze atzeman dituzte Lasarte-Orian ostiral, larunbat eta igandean. Irail erdialdera iristear, 96 positibo erregistratu dituzte honezkero gurean. Kutsatze-tasa 100.000 biztanleko 244,36koa da.

Abuztu erdialdetik aurrerako goranzko joera ez da geratu oraindik. Tendentzia horrekin jarraituz gero, aurreko hilabeteko 113 kasuak gaindituko lirateke. Grafika honetan ikus dezakezue abuztu eta iraileko kasuen konparaketa, egunez egun:

Beterri-Buruntza eskualdeko gainontzeko udalerrietan ere erregistratu dituzte positiboak azken hiru egunetan:

  • Hernanin, hamabi
  • Andoainen, hamar
  • Usurbilen, bost
  • Urnietan, lau
  • Astigarragan, bat

EAEko datuak

Larunbateko datuekin alderatuta, nabarmen jaitsi ziren erregistratutako kutsatzeak EAEko hiru probintzietan: 290 positibo detektatu zituzten, horietatik 117 Gipuzkoan. Egia da PCR proba gutxiago egin zituztela, 5.990 –larunbatean 7.626 egin zituzten–. 

Gaur-gaurkoz 269 pertsona daude ospitaleratuta koronabirusagatik, horietatik 63 ZIU Zainketa Intentsiboko Unitateetan. R0 edo birusaren birsortze-tasa 0,90ekoa da. Kopuru hori batetik gorakoa izanez gero, esan nahi du birusa zabaltze-egoeran dagoela.