Azken asteetako kutsatu kopuru handienaren berri eman du gaur Osasun sailburu Nekane Murgak. EAEko hiru lurraldeetan atzemandako kasuak batuta, 31 izan dira azken 24 orduetakoak, PCR proba bidez atzeman direnak. Horietatik ia bi heren, hemeretzi, Gipuzkoan detektatu dituzte. Gehienak Ordiziako agerraldikoak dira, kopuru zehatzaren berri eman ez duten arren. Azken informazioen arabera, 28 positibo baieztatu dituzte Goierriko herri horretan, eta agerraldiarekin zerikusia duten 48 daudela guztira. Astelehenean hasi ziren PCR testak masiboki egiten. Koronabirusak 21.360 pertsona kutsatu ditu orain arte EAEn. Horietatik 13.851 negatibizatuak izan dira honezkero, eta ospitaleko alta jaso dute beste 4.357k. Bi pertsona gehiago zendu dira; guztira, 1.621. ZIU unitateetan sei paziente daude ingresatuta, eta R0 edo birusaren birsortze-tasa 1,61koa da une hauetan. Horrek esan nahi du COVID-19a daukan pertsona batek beste 1,61 kutsa ditzakeela batez beste.
Beterri-Buruntzan aldaketarik ez
Beterri-Buruntza eskualdeko herrietan ez dute kasu berririk atzeman azken 24 orduetan. Hauek dira datuak herriz herri:
- Hernanin, 67 kasu
- Lasarte-Orian, 53
- Andoainen, 48
- Astigarragan, 23
- Urnietan, 22
- Usurbilen, hamasei
Guztiak batuta, 229 positibo detektatu dituzte eskualdean orain arte.