"Euskal sozialistok ezin dugu etxean geratu uztailaren 12an, bozkatzera joan behar dugu", nabarmendu du Mendiak gaur eguerdiko agerraldian. "Nazionalistek irabazi eta eurei bakarrik interesatzen zaizkien politikak egitea saihestu behar dugu; ezkerra bozkatu nahi dutenentzat, alderdi sozialista da aukera". Mikrofonoen aurrean jarri denean, atzo Eibarren eraso matxista bat pairatu zuen pertsonari "elkartasuna" adierazi dio, eta herriko alkate Agustin Valdivia egiten ari den lana goraipatu.
Gipuzkoako zerrendaburu Eneko Anduezaren aburuz, Mendia izan zen atzo gaueko hautagaien eztabaidako –ETB2 katean eman zuten– "garaile argia". "Konponbideak jarri zituen mahai gainean, beste batzuek zarata besterik egin ez zuten bitartean". Uste du alderdi sozialistak "emaitza oso onak" lortuko dituela igande honetan. Isla Plazako ekitaldia amaitu eta gero, Andatza plazara joan dira alderdi sozialistako ordezkariak, azoka bisitatzera.