"Niretzat hauek dira festak: Sorgin Dantza batez ere, erromeriak, musika eta dantza..." esaten zigun herritar batek atzoko Sorgin Dantza inprobisatua amaitu eta gero, oraindik egindako esfortzutik osatzen ari zela. Berak eta beste 50 bat pertsona animatu dira herritar talde batek antolatutako ekitaldian parte hartzera.
Mikel Eskisabel arduratu da dantzariak gidatzeaz, Oriako Sorgin Dantzaren bandera zeramala. TXINTXARRI-ri kontatu dionez, igande arratsaldean bertan bururatu zaie bozgorailua hartu eta Sorgin Dantzaren doinuez kale eta tabernak blaitzera. Sagardotegi plazan entsegu txiki bat egin, eta Kale Nagusiko tabernetan zeuden hainbat herritarren laguntzaz, Okendo plazara joan dira. Maskarak jantzi, bi ilara osatu, eta ordu laurden inguruz dantzatu dute.
Kameraren bila igo eta berriro plazara jaitsi garenerako, bazeramatzaten minutu batzuk Okendon gustura dantzan, baina atera ahal izan ditugu galeria bat osatzeko adina argazki, atzoko ekitaldia irudikatzen dutenak.
