'Berriro Irekitzeko Kanpaina' antolatu dute Aterpeak eta udalak

Usurbilgo Lanbide Eskolak egindako 478 maskara erosi dituzte Aterpeak eta udalak. Maiatz erdialdean eman zuten horren berri, Mirentxun egindako prentsaurrekoan.

Lasarte-Oriako merkataritza, ostalaritza eta zerbitzu establezimenduentzat "Covid-19aren krisiaren ondorioak ahalik eta txikienak" izan daitezen, osasun material sorta bana emango die Aterpeak eta udalak guztiei, ekainaren 1etik 5era. Mercero guneko beheko solairuan jaso beharko dituzte tresnak dendariek. 'Berriro Irekitzeko Kanpaina' izena du ekimenak.

Honako tresna hauek osatzen dute material sorta hori:

  • Metakrilatozko maskara bat
  • Gel hidroalkoholiko bat
  • Desinfektatzaile bat
  • Maskara erabiltzea gomendatzen duen kartel bat
  • Aforoa zehazten duen kartel bat, eta 65 urtetik gorakoentzako lehentasunezko ordutegiaren berri ematen duena

Ekimenaren antolatzaileek zehaztu dutenez, egitasmoaren xedea da herriko negozioek "berme handiagoz" ekitea euren jarduerari.