Eusko Jaurlaritzaren Osasun Sailak eguerdian egin du COVID-19aren hedapenari buruzko eguneraketa. Ohi bezala, atzo 20:00ak arte izandako bilakaeraren berri eman dute eta datuak xehatuta bildu dituzte txosten batean.
Nekane Murga sailburuak azaldutakoaren arabera, honakoa da EAEko egoera: 14.132 lagun kutsatu ditu koronabirusak, 2.556, Gipuzkoan; 8.025, Bizkaian, eta 3.551, Araban. Azken 24 orduetan, 352 positibo berri atzeman dituzte, 57, Gipuzkoan; eta horietako bat Lasarte-Orian. Bigarren egunez jarraian gora egin du egiaztapen kopuruak; guztira, 36 dira kutsatutako lasarteoriatarrak.
Ostiralean orain arteko proba kopuru handiena egin zuten, 4.968 PCR proba eta 4.441 test azkar, eta baieztapenak % 7 izan ziren, "oso baxua", Murgaren ustez.
Halaber, 19 heriotza berri erregistratu ziren atzo EAEn. Horiek gehituta, 1.212 dira COVID-19ak hiru herrialdeetan eragindako heriotzak. Edonola, ospitaleen egoerak hobera egiten jarraitzen duela nabarmendu du Murgak. Atzo 32 pertsonak jaso zuten alta.
