Lasarte-Oriako Udalak jakinarazi du adjudikatu dituela Zabaletako eta Kale Nagusiko igogailuen proiektuak idazteko lanak. I-Ingenia ingeniaritza enpresak landuko ditu txosten horiek, eta, beranduenez, lau hilabeteko epean entregatu. 54.036 euro bideratu ditu udalak horretara.
Bi igogailuen inguruko zenbait xehetasun eman ditu udalak. Esate baterako, 2018an onartutako Irisgarritasun Planaren parte direla. Oriarte institutuko Larrekoetxe eraikin atzealdetik Zabaleta auzorainoko bidea egingo du lehen igogailuak. Bigarrena, berriz, Kale Nagusitik Goikale eta Oztaranen goialdera iristeko eraikiko dute.
Bigarren igogailu horren eraikuntzak "fase bat baino gehiago" izatea aurreikusten du udalak. Goikale eta Oztaranera joango da aurrena. "Zataraingo sarbidea konpondu beharko da hori eta gero", nabarmendu udalak ohar bidez.