Beterri-Buruntzan hainbat azterketa egin eta gero, egileek ondorio nagusi bat atera dute: eskualdean bizi diren eta baztertze zein arrisku egoeran dauden pertsonak gizarteratuko dituen egitura "egonkor" bat behar dela. Horren emaitza da Beterri Errotuz SLU irabazi asmorik gabeko laneratze enpresa. Beterri-Buruntzako sei udalek –Hernani, Usurbil, Lasarte-Oria, Andoain, Astigarraga eta Urnieta– eta Erroak Sartu Gizarteratze Elkarteak sortu dute, elkarlanean.
Honako zerbitzuak eskaintzen ditu enpresa horrek: landa eta herri guneen garbiketa eta mantenura bideratutako zerbitzuak, ekonomia zirkularra sustatzen duten proiektuak –Sagarberritu, esate baterako– eta komunikazio zerbitzuak. Martxan dago dagoeneko: 2021. urterako aurreikusten dute zortzi langile edukitzea. Horietatik erdiek izan behar dute baztertze edo arrisku egoeran dauden pertsonak; sei hilabete eta hiru urte bitarteko kontratuak egingo zaizkie, gehienez.