Sekulako ikusmina sortu du Gipuzkoako Bertsolari Txapelketako final handiak: 6.000 lagun bildu ziren larunbat arratsaldean Donostia Arenan, sailkatutako zortzi bertsolarien lanaz gozatzeko asmoz. Lasarteoriatarrak izan ziren horietako asko, Ane Labaka herrikidea animatzera joandakoak. Saio txukuna egin zuen herritarrak, eta seigarren postuan sailkatu, 552 punturekin. Agin Laburu, Alaia Martin, Beñat Gaztelumendi –bera izan da txapelduna–, Beñat Lizaso, Jon Maia, Nerea Elustondo eta Oihana Iguaran ere aritu ziren.
Lehenengo fasearen ostean, Agin Laburu eta Beñat Gaztelumendi sailkatu ziren buruz burukora. Finago aritu zen añorgatarra, eta, 2015ean bezala, berak jantzi du txapela aurten ere. Xabier Gaztelumendi aitak jantzi zion. Agurreko bertsoa amari eskaini zion txapeldunak:
"Bertso eskola bukatzean
nor egoten zen gure zain
gaixo geundenean nor zen
min denak goxatzeko gai;
guk festa egin genezan
nork ez zuen egiten jai
eta nork eraman gintuen
sabel barruan bi anai.
Nahiz eta igual ez zenuen
gaur protagonismorik nahi
ama hau zuri eskaini gabe
ez nengoke lasai
Xabierren semea naiz
ta Pilirena ere bai"
Gai emaile eta aurkezle lanetan Ion Zaldua Brit eta Itziar Etxezarreta Arakistain aritu ziren. Epaimahaia, aldiz, hurrengoek osatu zuten: Amaia Otxotorena Gamio, Eneritz Azkue Basurko, Maite Sukia Olano, Mikel Beloki Urkizu, Mikel Lersundi Ayestaran eta Zigor Leunda Eizmendik. Idazkari lanetan, berriz, Joxemari Altuna Berridi, Silvia Etxaniz Alberdi eta Gorka Segurola Dorronsoro aritu ziren.