Bitik bi partida zakura. Ezker hormako Gipuzkoako txapelketa hasteko modu ezin hobea. Intzako bi bikote ari dira lehian: Jon Pello Artetxe eta Mikel Elola, 1. mailan; koska bat beherago, Haritz Urkia eta Gaizka Iruretagoiena.
Amezketako Zazpi Iturriko Zabalarekin eta Olanorekin neurtu zituzten indarrak herritarrek. Paretsua izan zen neurketa hasieran: urdinak joan ziren aurretik, 10-9, Artetxek eta Elolak norgehiagoka apurtu zuten arte. Forma fisiko hobea eta atzelariaren nagusitasuna baliatu zituzten partzial ederrak sartu eta 22-12 irabazteko.
Zegamako pilotalekuan jokatu zuten Urkiak eta Iruretagoienak, Tartaloetxeko bikotearen aurka. Gorabehera askoko partida izan zen: 16-7 zihoazen irabazten Intzakoak; 16-18 hartu zuten aurrea gero zegamarrek; eta 22-19 irabazi zuten azkenean lasarteoriatarrek. Bikote bakoitzak neurketara eraman zituen pilotak oso desberdinak ziren; bakoitzak berea ateratzean min egin zioten aurkariari, baina Intzakoak hobeto aritu ziren.