Pedalei eraginez, presoen eskubideen alde

Lasarte-Oriatik irten eta Usurbilera, Oriora edo Zarautzera joateko aukera izan dute

Gaur hasi da Luhusotik Gernikara doan bizikleta martxa eta lehen etapa Zarautzeraino iritsiko da. Lasarte-Oriako Sarek ekimenarekin bat eginez, Okendo plazatik Errekaldera bizikletaz joatera deitu ditu herritarrak. Bertan, Donostiatik zetorren martxara batu eta Usurbil, Orio edo Zarautzera joateko aukera izan dute lasarteoriatarrek. 

Beroak ez ditu gelditu gaurkoan txirringa hartu, kaskoa lotu eta presoen eskubideen alde pedalei eragiteko asmoa zuten lasarteoriatarrak. 16:45ean zuten hitzordua Okendo plazan eta talde-argazkia atera ostean gogotsu ekin diote bideari. Errekalden Donostiatik zetorren martxarekin bat egin dute. 

Behin martxara batuta, hiru aukera izan dituzte herritarrek: Usurbilen martxa utzi eta Zubietatik Lasarte-Oriara itzultzea, Orioraino jarraitu eta trenez herrira itzultzea edo Zaurautzeraino jarraitu eta bertan trena hartu eta Lasarte-Oriara itzultzea. 

Antolatzaileek "espetxe politika aldatzeko" eta "presoen auzia konpontzeko" unea dela adierazi dute Mont de Marsan-eko espetxean egindako agerraldian.