Merezitako oporrak hartuko ditu tatamiak. Merezitako oporrak hartuko dituzte judokek. 2018-2019 denboraldia itxi dute Maialen Chourraut kiroldegian erakustaldia eskainiz. Harmailetan zeuden guraso eta lagunei erakutsi diete aurten ikasitako guztia. Gorka Aristegi entrenatzaileak sasoiaren errepasoa egin du, eta judokek egindako lan bikaina goraipatu. Nabarmentzekoa izan da Eneko Eizagirre juniorrak kolkoratutako zilarrezko domina, Espainiako txapelketan.
Erakustaldiari ekin aurretik, gaztetxoenentzako puzgarriak jarri dituzte kiroldegian bertan. 10:30ak aldera hasi dira kirolariak beroketa ariketak egiten. Ordubete inguruko emanaldia egin dute. Bukatzeko, puzgarriak berriro. Denboraldi honetako sariak eta dominak ere banatu dituzte, giro ederrean.
