Hauteskunde kutsua hartu du aste honetako udalbatzarrak, legealdi honetako azken bigarrenak. Plenoa ekainaren 15ean osatu aurretik, beste bat egingo dute hurrengo hilaren hasieran.
Oria-Gaineko eremuko lursailean alokairu sozialeko etxebizitzak eraikitzeko mozioa aurkeztu du PSE-EEk, baina udalbatzarraren gehiengoak erabaki du mahai gainean uztea, ekainean osatuko den udalbatzar berriak onar dezan. EAJren proposamenez atzeratu dute gaia: "Ez zaigu egokia iruditzen hauteskundeak baino bi aste lehenago horrelako proiektu bat onartzea", azaldu du Jon Antxordoki EAJko bozeramaileak.
Kontu-hartzailearen erreparo txostenen kontu ematearen ondoren, EH Bilduren mozioa eztabaidatu dute. Gazteen autonomia eta emantzipaziorako laguntza lerroak ez dira aurrera atera, ADLOP eta EAJ abstenitu baitira. Horren ordez, PSE-EEren mozioa onartu dute, Eusko Jaurlaritzaren laguntzen aldekoa.