Protesta-ekintza izan behar zena ospakizun bihurtu da azkenean. Gizarteko hainbat sektorek "kulturaren aurkako erasotzat" hartu dute Eusko Jaurlaritzak duela gutxi iragarritako dekretua. Tabernek kontzertuak eskaintzeko daukaten ahalmena murriztu gura zuen egitasmo horrek: urtean hamabi kontzertu besterik ez. Hautsak harrotu dituela ikusita, erretiratu egin behar izan du lege proiektu hori.
Kontzertuak prestatzen jo eta su ibili diren lasarteoriatarrek erabaki zuten emanaldiak bertan behera ez uztea, eta kultura kalera ateratzearen garrantzia azpimarratzea, nahiz eta dekretuaren mehatxua joana izan. LOUH, Denbora, China Chain, AC/RC eta The Lobsters taldeek eskaini zituzten emanaldiak Antonio Mercero guneko arkupe parean, besteak beste. Emanaldi laburrak izan ziren, hamabost-hogei minutukoak, baina energiaz eta elektrizitatez beteak. Okendora hurbildu ziren ikus-entzuleek gogotik gozatu zuten musika emanaldiez.
Euskal Herri osora zabaldu dira gisa honetako protesta-ospakizun ekitaldiak. Eusko Jaurlaritzak dekretu hori kaleratzeko iragarpena egin zuenean Arteak Ireki izeneko plataforma bat sortu zuten hainbat kultur eragilek.