Alkohol gehiago eta gorrixkagoa

Alkohol gehiago eta gorrixkagoa
Txotx denboraldia irekita egona arren, larunbatean zabalduko ditu ateak Otegi sagardotegiak. Denboraldiari hasiera emateko azken lanak egiten aritu dira egunotan, eta prest dute guztia 2019. urteari hasiera emateko. Sagardo "gorrixkagoa" egin dute

Sagarra bildu, jo eta upeleratzen aritu dira irailaz geroztik Lasarte-Oriako Otegi sagardotegian. Hilabeteetako isilpeko lana  izaten dute sagardo denboraldiek aurretik. Horiek amaituta, 2019ko uzta prest dute, eta larunbatean zabalduko dituzte upelak sagardo berria dastatzeko. Joxe Mari Otegi eta Pili Mercader sagardotegiko jabeek aurtengo denboraldiko sagardoaren berri eman diote TXINTXARRI-ri.

"Beste urteetan baino kolore gorrixkagoa izango du aurtengoak". Horixe nabarmendu du Otegik. Otsailetik maiatzaren lehenera bitarte izango da Sollane baserrian sagardoaz gozatzeko aukera. Denboraldia amaituta ixten dituzte ateak, berriz ere datorrena prestatzeko.

Iazkoarekin alderatuta, "alkohol gehiago" ere izango du edariak aurten. Urteko sagarraren arabera izaten da hori. Sagardo ona egiteko sagarraren kalitatea garrantzitsua da: "Sagarrak osasuntsu behar du egon, frutak jasotzen duen eguzki kopuruak ere eragina du". Horrez gain, garai egokian jasotzea ere ezinbestekoa dela azaldu du Otegik.

Bertako sagarrondoek, ordea, ez dute nahi adina sagardo egiteko ematen. Bi urtez behin izan ohi du uzta oparoa sagarrondoak, eta iaz tokatu zen emari ona. Horri aurre egiteko, kanpotik ekarri behar izaten dute fruta sagardogileek: "Hemengo sagarrondoek fruitu gutxi eman dute aurten, eta Frantziatik ekarri dugu sagarra".

Gaztain egurrez egindako bederatzi upel ditu Otegi sagardotegiak, eta horietatik bakarra utzi dute hutsik; 40.000 litro ekoitzi dituzte guztira.

Hilabeteetako lana

Upeletan sartu aurretik lan asko egin behar da, ordea. Iraila edo urria aldera (sagarraren heldutasun mailaren arabera), hasten dira sagarra jasotzen. Lurretik eskuz jasotzen dute fruta, kizkiaren laguntzarekin. Garbitu eta "sagarra jo" edo txikitu egiten dute gero. "Zanpatzea" izaten da ondorengo prozesua; "dolarean sartu eta txikitutako sagarra estutu egiten da, ahalik eta muztio gehien lortzeko". Lortutako muztioa "tiniara" pasako da, eta hortik upeletara.  Horko irakinaldiarekin bihurtuko da sagar zukua sagardo.

Denboraldiak irauten duen hiru hilabeteetan gordetzen da sagardoa upeletan, baina behin epe hori igarota, botilatara pasatzen dute edaria. 

Hor hasten dira zailtasunak, Pili Mercaderren esanetan: "Denboraldian zehar bezero ugari  gerturatzen dira gure sagardotegira, baina jendeak ez du deboraldiaz kanpo sagardoa botilatan erosteko ohitura handirik". Urte osoan eskaintzen du Otegik sagardoa erosteko aukera.

Giro onean igaro ohi dute Otegin sagardo denboraldia. Lasarte-Oriako sagardotegi bakarra da, eta urtero izaten dituzte bezero "jatorrak": "Betiko bezeroak etortzen dira gurera, gustura sentitzen gara beraiekin".  Jakitun dira Hernani eta Astigarraga aldean sagardo denboraldian gertatzen diren ezbehar eta liskarrez, baina beraiek ez dute horrelakorik bizi: "Sagardotegi asko daude zonalde horretan, jende asko biltzen da astebururo bertan, eta errespetuaren mugak gainditzen dira askotan". 

Etorkizuna ikusten die Otegik sagardotegiei, baina aitortu du beherakada nabari dela: "Garai batean astean zehar ere etortzen zen jendea, orain, berriz, ostiraletik igandera izaten dugu eskaera gehien". Hala ere, nabari du jendeari gustatzen zaiola sagardotegira etorri eta edanaz zein janaz gozatzea; beraz, horrek eutsiko dio etorkizunari. 

Prestigioa lortzeko bidean da sagardoa, eta horretarako lanean ari dira sagardoaren inguruko hainbat elkarte eta ekoizle. Horren adibide da edaria kopan zerbitzatzeko azkenaldian egiten ari diren apustua. Sagardotegien eboluzioaren eragina dela uste dute Otegin: "Sorreran gaur egungo basoak baino txikiagoak erabiltzen genituen, batek daki, agian kopan zerbitzatuko dugu laster".