Pozik dago Axier Arteaga (Lasarte-Oria, 1996), nahiz eta atseden hartzeko denbora gutxi izan duen azken aldian; Asegarcek bere aldeko apustu garbia egin du, eta udako hiru txapelketa garrantzitsu jokatu ditu: San Fermin, Bilboko Aste Nagusia eta Donostia Hiria torneoak. Ez du txapelik lortu, baina ongi jokatu du pilotari handien artean, eta itxura ona eman du hiru torneotan. "Ikasteko balio izan dit; oso gustura geratu naiz egindako lanarekin". Halaber, aste honetan bertan garaipena lortu du; Ordiziako festetan jokatu du Eskirozekin batera, Laso-Erasun bikotearen aurka (22-18).
San Ferminetan bi tantorengatik geratu ziren finaletik kanpo azken momentuan. "Pena handia izan zen unean bertan. Baina ez genituen etxeko lanak egin, eta besteen emaitzen esperoan egoteak hori dauka", adierazi dio TXINTXARRIRI-ri. Jon Ander Albisurekin batera egin zuen debuta torneoan.
Donostian finala
Bilbon finalerdietan geratu zen kanpoan, baina partida ona bete zuen. Gaizki hasi zuten norgehiagoka; hamar tantoko desabaintaila izan zuten (19-9), baina ia buelta ematea lortu zuen Arteagak.Hamahiru tanto egin zituen, eta garaipenetik gutxira geratu ziren (22-19).
Albisu ere izan zuen lagun bikoteko partida horretan, baina freskura apur bat falta zitzaion atzelariari. "Maila nahiko txukuna eman nuen, gustura geratu nintzen nire partidarekin. Anderrek partida asko jokatu zituen abuztuan, eta ez zuen bere egunik onena eduki".
Donostiako Hiria torneoan egon zen txapela eskuratzetik gertuen, Rezusta atzelariarekin batera. Irribarria eta Albisu garaitu zituzten lehenengo (16-22), baina ezin izan zuten Olaizola II.a-Zabaleta bikotearekin. "Ez nuen agian partida oso ona egin, baina ez nintzen gaizki ibili. Azken finean, gaur egun dauden bi atzelari onenen aurka jokatu dut, eta esan daiteke ere, Altunarekin batera, aurrelari onenaren aurka: Aimar".
Pilotari handien aurka lehiatu eta maila ona emanda, konfiantzaz bete da Arteaga. "Hasiera batean errespetu handiz aritu naiz. 'Nola jokatuko dut ba nik hauen aurka?', pentsatzen nuen. Gero ikusten da gauzak ondo eginez kontra egitea posible dela".Gaztea izan arren, edozeinen aurka ongi lehiatzeko gai da egun. "Uda honetan koska bat egin dut gora".