Lasarte-Oriako festa nagusiak, sanpedroak, bukatu dira, baina udak aurrera egin du, eta herritarrek badute oraindik aukera ongi pasatzeko herrian bertan. Karmengo Amaren eguna ospatu dute Oria auzoan. Goizean goiz festen abisua eman dute Ttirriki Ttarrakako trikiti eta panderoek. Gaztetxoenek buruhandiak zirikatu dituzte gero, ihesean joateko. Halere ere, goizeko ekitaldi jendetsuena tradizionalena ere izan da: meza nagusia Karmengo Kaperan. Predikua bakarrik ez, aurreskua dantzatu eta abestiak kantatu dituzte kaperan. Luntxarekin amaitu dituzte goizeko ospakizunak.
Arratsaldean, berriz, haurrentzako ekintzekin jarraitu dute festa eguna. Eguraldia, ordea, mehatxu izan dute egun osoz, eta festa zapuztuko zuen beldur, frontoian egin dituzte puzgarriak. Pozik aritu dira auzoko gaztetxoak saltoka, baina batek baino gehiagok susto ederra hartu du buruhandiak agertzen ikusi dituenean. Bizkarreko ederrak eman dituzte, eta korrika saio biziak egin dituzte gaztetxo lasarteoriatarrak harrapatzeko.
Bien bitartean, Oriako I. Toka Txapelketan aritu dira helduak. Bruneteneako lorategian trebetasun handiz jaurti dituzte burdinazko piezak. Martxeli Canflanca eta Maria Jesus Olano izan dira emakumezkoetan garaile, eta Antonio Amondarain, Leadro Miner, Carlos Irastorza eta Jose Antonio Lertxundi gizonezkoetan.
Sorgin Dantzak ere ez du hutsik egin; sortu zuen auzoari dantza erakustaldia eskaini dio. Karmengo kaperatik abiatu, eta Bruneteneako lorategirainoko ibilbidean dantzan aritu da zortzikotea. Baina ez da dantzan aritzeko tarte bakarra izan. Horren ostean, zunba erakustaldia eskaini dute, eta gazte uagri inguratu dira erritmo biziak dantzatzera.
Festa eguna amaitzeko Ibai Berriak musika taldeak emanaldia eskaini die bertaratutako herritarrei. Euriak zertxobait busti arren, ikus-entzuleak animatu dira taldearen doinuak dantzatu eta abestera. Adin guztiei zuzendutako abestiak eskaini dituzte.
Ikusi hemen ekitaldiekin osatu dugun galeria.