Azaro hasieran Manuel Lekuona kultur etxean egindako mahai-inguruan, Ibon Fernandez Iradiren abokatu Maritxu Paulusek zioen gabonetarako jakingo zela beharbada herritarraren zigor eteteari buruzko erabakia. Pixka bat aurreratuko dela dirudi, Parisko Zigorren Ezartzeko Auzitegiak abenduaren 15ean jakinaraziko duelako larriki gaixo dagoen euskal presoa (esklerosi anizkoitza dauka) aske uzten duten ala ez.
Berria egunkariko lankideek jakinarazi dutenez, bi ordu eta erdiko saioa egin zuen atzo aipatu epaitegi horrek. Prokuradoreak zigor etetearen aurka egin zuen.
Lannemezango espetxean (Frantzia) dago Ibon Fernandez Iradi gaur egun. Joan den urtean Zigorren Ezartzeko Epaitegiak ebatzi zuen bere espetxealdia eta gaixotasunaren tratamendua bateragarriak zirela, baina kasazio auzitegiak baliorik gabe utzi eta agindu zuen kasua berriro aztertzeko.