Beste urtebetez, hamahirugarrenez, Zero Sette Akordeoi Orkestrak eta udaleko Kultura Sailak antolaturiko XIII. Akordeoi Jaialdia egin zen atzo, Lasarte-Oriako Manuel Lekuona Kultur Etxean. Aurtengo jaialdian, Euskal Herriko zein nazioarteko goi-mailako musikariak izan ziren protagonistak.
Akordeoilariekin batera, beste zenbait instrumentu ere aritu ziren atzokoan, baita dantzari bat ere, eta askotariko estiloetako obrak eskaini zizkieten bertaratutakoei. Munduan barrena bidaiatzeko aukera ederra izan zuen atzokoan publikoak.
Iluntzeko 19:00etan eman zioten hasiera musika emanaldiari eta Susana Cencillo akordeoilariak eta Javier Perez tronpeta jotzaileak osatutako bikotea izan zen agertokira igotzen lehena. Orian urtebete elkartu ziren musika-bikote gisa eta urte askotako esperientzia duten musikariaren eskutik, euskal kantak, Bossa Novak eta Frantziako musika doinuak entzun ahal izan ziren atzokoan, besteak beste.
Ordu erdiko musika emanaldiaren ostean, bigarren taldea igo zen oholtzara. Hiru musikarik eta Claqué dantzari batek osatutako 'Clak'Tet' taldearen txanda izan zen orduan. Roberto Gervasi Akordeoilariak, Yannis Constans gitarra jotzaileak, Camille Wolfrom kontrabaxuak eta Sagari Ur dantzariak, musika eta dantza uztartu zituzten emanaldian zehar. Musikarien doinuak eta erritmoak dantzatu zituen Claqué dantzariak emanaldi ikusgarrian. Swing, Jazz eta musika brasildarreko doinuak entzun ahal izan ziren taldearen atzoko emanaldian.
Julien Gonzales musikari frantsesa izan zen arratsaldeko hirugarren eta azken gonbidatua. Musika estilo ezberdinetako doinu ugari entzun ahal izan ziren atzo eskaini zuen kontzertuan. Horien artean, euskal doinuak, Jazz estiloko piezak, tangoa, Frantziako Musette-a, musika klasikoa eta Errusiako musika piezak eskaini zizkien ikus-entzuleei.
Emanaldiak amaitu ostean, Zero Sette Akordeoi Orkestraren eta udalaren izenean, oroigarri bana eman zieten gonbidatuei. Willy Berasaluze Debako artistak jaialdirako sortutako 'Akordeoiaren Olatua' garaikurra jaso zuten musikariek udaleko ordezkarien eskutik.
Jaialdiarekin amaitzeko, gonbidatu guztiek elkarrekin azken obra bat eskaini zuten eta txalo zaparrada luze batekin agurtu zituen ikusleak artista guztiak.