Olioa margo, serigrafia, grabatua, akuarela... Hainbat arte diziplina jorratu ditu Arantza Agirre segurarrak, duela hamar urte margolaritzaren munduan murgildu zenetik. Jalgi Kafe Antzokiko hormetan eskegi ditu horietako zenbait; otsailean zehar edukiko dituzte ikusgai bezero eta arte-zaleek.
Hasieran, koadroak lagunartean edo etxean erakustera mugatu zen Agirre, baina urteen poderioz margolanak plazaratzea erabaki zuen. Azkeneko bi urteetan aretoz areto ibili da artista, haren obrak erakusten: azkena, Donostiako Bulebarrean, pasa den igandean. Hernanin ere bat dauka jarria, zenbait tabernatan erakutsi izan ditu, Irungo Kutxako sukursal batean, eta abar.
Zaletasuna eta espresio-bidea da margolaritza Arantza Agirrerentzat: haren burua ezagutzera eraman du, eta barneko sentimenduak plazaratzeko bidelagun izan du baita ere.