Harkaitz Cano, Ane Labaka, Uxue Alberdi eta Igor Elortza izan ziren iaz Irakurle Txokoak antolatutako lehen bertso afari literarioko protagonistak. Ekimen honek izan zuen arrakasta ikusirik, Irakurle Txokoko kideek bigarren edizioa antolatu dute.
Afari berezi honen helburua, iaz bezala, Irakurle Txokoa herrian ezagunagoa egitea da, baita ekimena diruz laguntzea ere.
Saioa
Otsailaren 27an, 21:00etatik aurrera, literatura lanen hitz eta gaiak berriro ere bertsoak sortzeko oinarri izango dira Xirimiri elkartean.
Erronka honi hiru bertsolarik egingo diote aurre. Ane Labaka herritarrak berriro ere parte hartuko du ekintzan, baina oraingoan Maialen Lujanbio eta Unai Iturriaga izango ditu lagun.
Testuak irakurtzen eta gaiak jartzen Irakurle Txokoko gidaria Danele Sarriugarte izango da.
Menu gozoa
Baina bertsoa eta literaturaz gozatu baino lehen, bertso afariko menu gozoa dastatuko dute Xirimiri elkartean biltzen diren lagunek.
Txanpinoiak saltsan, kalabaza krema sesamoarekin, oilaskoa garagardotan hornigaiarekin eta txokolate beroarekin betetako Petit Suisseak jango dituzte.
Txartelak
Bertso afari literarioko txartelak dagoeneko eskuragarri daude Jalgi Kafe-antzoki eta Ilargi tabernan.
Ekitaldiaz gozatzeko langabetuek eta ikasleek 15 euro ordaindu beharko dituzte eta gainontzekoek, 20 euro.
Txokoko kideek ohartarazten dutenez, horiek eskuratzeko azken eguna otsailaren 24a, asteazkena izango da.
Asteartean hitzordua
Baina bertso saio berezi honen aurretik, Irakurle txokoko kideek hilabeteroko hitzordua dute otsailaren 16an, asteartean, 18:30ean Manuel Lekuona kultur etxean.
Oraingoan, Katixa Agirreren 'Atertu arte itxaron’ liburua aztertuko dute. Euskal Herrian zehar egindako kotxe bidai baten kontakizuna da. Gune eta historiako gertakari ezberdinak errepasatzen ditu eta gogoetarako tartea ere badute pertsonaiek.