Sorgin Jaiak zerbaitekin identifika badaitezke, Kamioi Rock-a izan daiteke erreferente argienetako bat. Duela hamabost urte sortutako ideia horri ez zaio gasolina bukatu oraindik, ezta gutxiagorik ere: kalez kale ibili da kamioia, Rock Kam Broom taldea gainera igota egon delarik, musikarekin Lasarte-Oria alaituz.
Kamioia martxan jarri aurretik hasi dira Okendo plazako ekitaldiak. Arratsaldeko seietan eztarriak freskatu eta mokadutxo bat jateko aukera eduki dute herritarrek, Ttakun KEk antolatutako sargardo eta Aterpearen sardina dastaketetan, hurrenez hurren. Askok sagardo edalontzia eta sardina platertxoa eskuan zituztela ikusi dute Tio Tenoren Semeak taldearen emanaldia, Okendon bertan. Sardinek baino are aho zapore hobea utzi du emanaldiak ikusleen artean: ikuskizun originala, dibertigarria eta freskoa eskaini du aipatu taldeak. Emanaldi hori bukatu denean, hainbat herritarrek astindu dituzte gorputzak Dabid Egizabal eta Maider Oiartzabalek gidatutako dantza tradizional saioan.
Haurrentzako xexenak Isla Plazan
Ikusmira handia sortu du lasarteoriatarren artean haurrentzako xexenen itzulerak. Zenbait urtez egitarautik at utzi ostean, Udalak aurten berreskuratu du ekitaldi hori, eta gaztetxoek ez dute hutsik egin. Asko izan dira xexenen aurrera ateratzera ausartu direnak. Era berean, zenbait poniren gainean ere ibili ahal izan dira haurrak.
Gazteak ez dira izango fisikoki agian, baina bai izaeraz. Biyak Bat adinekoen elkarteko kideek erakutsi dute martxa ederra daramatela euren gorputzetan, eta herriko kaleak alaitu dituzte, Los Incansables txarangak lagunduta.
Alaitasuna eta barre algarak eragin dituzte herritarren artean Trapu Zaharrak antzerki taldekoek. 'A cal y canto' lana taularatu dute Elizatze plazan. Ikusle ugari gerturatu dira bertara.