Ttakun kultur elkarteak, Lasarte-Oriako Udalaren eta herriko hainbat talderen laguntzaz, erromeria goiza ederra antolatu du ermitaren inguruan.
Erromeria
Lehenik, 11:00ak aldera, Ama Birjinaren ohorezko meza izango da ermitan. Honetan Alboka Abesbatzeko kideen kantuez gozatu ahalko da.
Amaitzean, Ttirriki Ttarraka eskolako lagunek haien doinuekin alaituko dute eguna.
Herri-kirolek ere izango dute bere tartea. Telleria anaiak harri-jasotzaile lanetan eta Mugertza anaiak aizkora lanetan izango dira.
Erakusketako lanez gain, erronka ere ikusi ahalko da. Bi bikote osatuko dira, Telleriatar eta Mugertzatar bana bikoteetan eta zehazteke dagoen lan bat egin beharko dute.
Amaitzeko dantza egiteko tartea izango da Ttirriki Ttarraka kideko lagunek.
Taberna
Honetaz gain, erromeriara hurbiltzen diren lagunek indarrak berreskuratzeko aukera izango dute ermita ondoan egongo den tabernan.
Odolkia, txorizoa, salda beroa eta edariak izango dira salgai.
Autobusez edo oinez
Antolatzaileek gogoratzen dute, egun horretan ermitara ezin dela kotxez igo.
Erromeriaz gozatu nahi duten herritarrek oinez edo autobusez egin dezakete Azkortera bidea.
Autobus zerbitzua goizeko 9:00etan hasiko da Biyak Bat erretiratuen egoitza aurreko geltokian.
Jaitsiera ere autobusez egin ahalko da. Zerbitzua erromeria amaitu artean egongo da martxan.