2016an Ostadarreko bazkide izateko asmoa duten herritarrek aukera dute dagoeneko horretarako, kanpaina abian jarri baitu elkarteak. Geltoki Kalean duen bulegora joan beharko dute interesa dutenek, 18:00etatik 20:00etara bitartean.
Elkarteak jakinarazi duenez, pasa den urteko kuotak mantenduko ditu: 15 euro ordaindu beharko dituzte 16 urtetik beherakoek, 25 euro 17tik gorakoek eta bonu familiarrak 40 euro balioko ditu.
Bazkide direnei eskertza
Honezkero Ostadarreko bazkideak diren herritarrei eskerra eman dizkie elkarteak: "Ezinbestekoa da haien ekarpena gure kirol proiektuak aurrera egin dezan. Gaur-gaurkoz ditugun kirol ataletan 900 bat kirolari mugitzen ditugu urtean zehar, kirola sustatzen dugu Lasarte-Orian eta Kros Herrikoia eta 3x3 Saskibaloi festaren gisako ekimenekin herriko merkataritza bultzatzen dugu".
Era berean, elkarteak gogorarazi du bazkide izateak badituela hainbat abantaila: "Izen-ematea merkeagoa da Lasarte-Oria Bai! Kros Herrikoian, zenbait komertziotan deskontuak dituzte eta urtero-urtero otar bat irabazteko aukera dute, guk geuk zozketatzen duguna".