Lehiaketaren oinarriak
Aurtengo lehiaketaren oinarrien berri eman du Danok Kidek, ohar bidez. Herritarrek aurkeztutako lanek 80 x 60 zentimetro izan ditzakete gehienez. Interesa dutenek bakarka edo taldeka aurkeztu ditzakete lanak; hori bai, pertsona edo talde bakoitzak lan bakarra aurkeztu beharko du.
Jaiotzak entregatzeko bi egun jarri ditu Danok Kide elkarteak: abenduaren 19a (ostirala) eta 20a (larunbata). Lanak arratsaldeko seietatik zortzietara bitartean entregatu beharko dituzte herritarrek, Blas de Lezo kaleko 11. zenbakian. Jaiotzak eramaterako orduan, gutunazal bat entregatu beharko da: kanpoko aldean bere adina zehaztu beharko du parte hartzaileak. Barruan berriz, izena, helbidea eta telefono zenbakia.
Kategoriak eta sariak
Lau adin-kategoria egongo dira aurtengo lehiaketan. 6 eta 9 urte artekoak A kategorian sartu ditu Danok Kidek; B kategorian 10 eta 13 urte bitarteko gaztetxoak lehiatuko dira; 14 eta 17 urte bitartekoak osatzen dute C kategoria eta D kategorian sartuko dira beste guztiak, 18 urtetik gorakoak alegia.
Sariak ere kategoriaka banatzea erabaki du Danok Kide elkarteak. A kategoriako lehen saria eskuratzen duenak 60 euro eta garaikur bat jasoko ditu, eta 40 euroko saria bigarrenak. B kategoriari dagokionez, lehenengoak 70 euro eta garaikurra irabaziko ditu, eta 50 euro bigarrenak. C kategoriakoak hauek dira: 90 euro eta garaikurra irabazlearentzat, eta 60 euro bigarrenarentzat. Azkenik, 120 euro eta garaikurra eskuratuko ditu D kategorian irabazten duenak, eta 90 euro bigarren postuan geratzen denak.
Abenduaren 28an (igandean) banatuko ditu sariak Danok Kide elkarteak, 12:00etan.