Inaugurazio ekitaldia festa antzeko bat izan da eta herriko artisten lanak ikusgai izan dira: Jose Luis Mayo eta Edel Pozoren eskulturak, Nicu Barb eta Manuel Mongeren pinturak eta Oscar Barreraren argazkiak ikusteko aukera izan dute Villa Mirentxuko jaialdira hurbildutako dozenaka lagunek.
Photocall-a eta estilismo desfile bat ere egin dute orrazkera bitxiekin. Idatzien erakusketa ere prestatu dute Aitor Avilak eta Vanesa Sanzek eta ikus-entzunezko lanei dagokienez, “Emozioak” izeneko zazpi minutuko bideo bat ere proiektatu dute.
Aurkezpenean musika faltarik ere ez da izan. Maria Callejas arpa-jotzaileak doinu lasaiak atera dizkie arpa ikusgarriaren sokei eta kontzertu lasaia eskaini du. Denek batera, artista zein herritarrek, afari-merienda egin dute ekitaldia amaitzeko.
Gaurkoa estrainaldia izan da, baina irailaren 26, 27 eta 28an ere erakusketa irekita egongo da Villa Mirentxun, arratsaldeko 18:00etatik 21:00etara arte.