Ane Labakak Xabier Lizardi saria irabazi du

Ane Labakak Xabier Lizardi saria irabazi du
Ostiralean jokatu zen finalean eskuratu zuen txapela herriko bertsolariak. Sei urtetan izan da txapelketan parte hartzen eta guztietan finalera heldu den arren, azken honetan lortu du gailentzea. Zarauzko bertso eskolak antolatzen du Xabier Lizardi saria eta aurtengoa 38. edizioa izan da.

Ane Labaka herriko bertsolaria pozik dago ostiralean Zarautzen lortutako txapelarekin. Berak azaldu bezala, Lizardi saria garrantzitsua da bertsolari gazteen artean eta “sei alditan saiatu ondoren irabaztea lortu dut”.

Hamasei bertsolari aritu dira aurtengo edizioan kantuan eta sei izan ziren ostiralean Modelo aretoan jokatutako finalera iritsi zirenak, herritarrarekin batera, Arnaitz Lasarte, Amaia Iturrioz, Imanol Irazustabarrema, Aratz Igartzabal eta Jon Gurrutxaga.  

Bertsolari gaztea gustura aritu zen kantuan “ariketa batzuetan beste batzuetan baino erosoago sentitu nintzen baina orokorrean pozik geratu nintzen egindako lanarekin”. Sari hau abuztua amaieran jokatzen dela aipatu du Anek eta “oporrak tarteko, ez zaude beste garai batzuetan bezain prestatua”.

Iaz Asier Aspiroz Zubietarrak eskuratu zuen saria eta txapelketa honek abian jartzen duen bertso paper lehiaketa duela bi urte Anek irabazi zuen ere.