Manuel Lekuona kultur etxeko aretoan gaur arratsaldeko 19:00etatik aurrera, presoen hitzak irakurri, dantzatu eta antzeztuko dituzte. Presoen lagunek eta senideek ekitaldi hau antolatzen duten laugarren urtea da eta herritar ugari biltzen dituen ekimena da, bai oholtza gainean, baita ikusle modura ere.
Antolatzaileek kontatu dutenez, "espetxean daudenen herritar, lagun, senideen testuekin osatu dugu aurtengoa ere".
Honetaz gain, Eguberri bezperan Okendo plazan zabaldu zen maindirea ere egongo da Manuel Lekuonako ekitaldian. Izan ere, "kaleko zein errezitaldiko soinu-hiz-usainak jasoko dituen maindirea" izango da.
Baina errezitaldiaz gain, afaria ere antolatu dute. Xirimiri elkartean izango da eta tiketak 10 euro balio ditu.
Herritarrak ekitaldian eta afarian parte hartzera gonbidatzen dituzte antolatzaileak.
Ahobizarra kentzeko hemen iazko pasarteetako bat:
Dantzan dabilen herria guria
Bai, kukuka dabil
Edo Ttakun Ttakun
Ostadarra ikusten da
Xirimiria ari dun aldiro
Eta ikusi zukua ateratzen gaztiak
Eta ikusi sortur eta sortuz guztiak
Plazerra da Txintxarriaren
Oihartzunak irakurtzia
Dilin dalan dilin dalan
Plazerra gure hitzekin egiten dezutena
Sentitu, ikusi eta entzutia
Eta gaur zuen artian egotia ere!
(Aitzol 2012 Paris)