Nola sortu zen Plastic?
Taldeak lehen Mongrey izena zuen. Baina talde hori utzi eta 2007aren hasieran talde berria sortu genuen, beste musika eta estilo batekin. Oscar bateria, Josek gitarra eta ni neu Alberto baxuan. Abeslaririk gabe ginen eta, hala ere, abestiak egiten hasi ginen.
Iñigo udararen ostean hasi eta abendurako grabatzen hasi ginen. Sei temako maketa egitea zen asmoa, baina azkenean maketa diska bihurtu zen. Martxoan edo apirilean argitaratu eta maiatzaren 23an lehen kontzertua izan genuen. Eta hamaika bat kontzertu eman genituen Haize Orraziko kontzertua baino lehen.
Beraz, epe laburrean egin duzue guztia?
Bai, horrela da. Gehien sufritu duena Iñigo izan da. Iritsi, dena ikasi eta grabaketa egin behar izan zuen. 5 ordutako entseguak egiten genituen. Gogorrak izan ziren benetan.
Eta grabaketaren ostean, kontzertuak prestatu. Hilabete batean 6 kontzertu eman genituen. Batzuetan aste bereko ostegun eta ostiralean genituen kontzertuak. Lokaletan 30 pertsonentzarako ohituak ginen eta 700 pertsona zeuden Haizearen Orrazian. Izugarria izan da. Honetaz gain, my space-a www.myspace.com/grupoplastic eta web orrialdea www.plasticband.es ere egin ditugu. Urte erdian lan asko egin dugu.
Noren influentziak dituzue?
60 eta 70 hamarkadako rocka gustoko dugu. Egunkari batzuetan mod estiloa dugula diote, Ocean Color scene, The Who, charlatans edo Brit poparen soinua dugula ere esan dute, Oasis edo antzekoekin parekatu dute.
Eta arrazoi dute hein batean. Soinu britanikoa da, ahots armoniei dagokienez. Baina 60ko rockeko erritmoan oinarritzen gara.
Gainera, ez dugu inoren bigarren zatia izan nahi, Plastic izan nahi dugu. Dagoeneko estilo pertsonala dugu. Beste talde baten antza hartzen diotela gure musikari, normala da. Ezin da gauza berri askorik egin, gehiena sortua dago.
Abestiak egiterako orduan zertan oinarritzen zarete?
Eguneroko gauzetan eta esperientzietan oinarritzen gara, abesti protesta ere badago. Esate baterako, telebistan agertzen denaren aurka egiten dugu.
Ez dira amodio eta maitasun ezan oinarritzen direnak, baditugu, baina ez da hori gure oinarria.
Nola bihurtu zen maketa diskoan?
Idea aste betean maketa egitea zen. Baina maketak itxura ona zutela ikusita, diskoa egitea pentsatu genuen eta azkenean bi hilabete egon ginen. Talde garrantzitsuek grabatu dute, guk grabatu dugun lekuan, Iñaki de Lucasen estudioan.
Nolako izan da autoekoizketaren esperientzia?
Grabazioa aste betean egin genuen. Nahasketak eta ekoizketa egin behar genituen ostean. Oso zaila izan zen lanetik atera eta estudion sartzea. Gaueko hamarrak arte egunero, beti gauza bera entzuten, bateriako bonboak, gitarra soinuak, etab. Zoramena izan zen.
Baina Iñaki de Lucasek esperientzia handia du. Asko lagundu gintuen eta ideiak eman zizkigun.
Ostean, Madrilen kopiak egin genituen, abestiak registratu, jabetza intelektuala izan eta plagiorik ez egoteko. Eta salmentan jarri genuen.
Nolako harrera izan dute taldeak eta diskoak?
Myspace-a dugu eta bertara jende pila sartzen da. 60 bat egunero. Beraz, harrera ona dugula esan daiteke. Gainera, diskoak iritzi onak izan ditu, ez lagunak soilik, egunkarienak ere.
Eta ongi saltzen da, nahiz eta kontzertuetan eta ahoz aho saltzen den. 1000 egin genituen eta gutxi batzuk geratzen zaizkigu. Dendetan ere badugu salgai, Gong-en, baina kontzertuetakoa ikaragarria da.
Esate baterako, kontzertu batean 30 pertsona egon eta 20 disko saldu genituen, beste batean, Lizarran, Alemaniako bikote batek zazpi cd erosi zituen. Sinadura eta guzti.
Madrilen ere jo zenuten, ez?
Bai, La boca del Lobon kontzertua eman genuen. Areto oso garrantzitsua da, Kiko Veneno, Estopa edo Amaralek jo dute bertan. Ezagunei esker, kontaktuak egin eta hara joateko deitu gintuzten.
Madrileko aretoetan jotzea zail da. Hemen taberna batetara hamar disko edo bidali daitezke, han, berriz, ehun bat dira eta Espainia osokoak, baita musiko ezagunak ere. Mugitu behar zara eta aurpegia izan. Mundu hau horrelakoa da ehun ezezko izango dituzu, egun batean norbaitek sorbaldan emango dizu.
Esate baterako, bateria eta biok, Oscar, Madrilera joan ginen, Radio3 irratira. Disco grande programako Julio Ruizekin egon nahi genuen. Dena prest zegoen lehenago iritsi eta berarekin hitz egiteko. Baina programa hasia zen iritsi ginenerako eta, hala ere, barruraino sartu, bertan egon eta Juliok diskoa izendatzea lortu genuen.
Eta ostean, Donostiako Pop Rockera aurkeztu zineten, nolatan?
Joseren jefeak animatu gintuen. Honek lanera eraman zituen diskoak saltzeko eta berak entzun eta Pop Rockera aurkezteko epea irekia zegoela esan zuen. Denbora zegoen bi egun edo eta bidali genuen.
Zenbat kontzertu eman zenituzten lehiaketan?
Bi, finalerdian eta finalean. 40 talde aurkeztu ginen lehiaketara eta 9 aukeratu zituzten.
Finalerdiak Antiguoko Loka aretoan egin ziren hiru asteburutan. Kontzertu bakoitzean hiru talde zeuden eta bakoitzetik talde bat aukeratzen zen finalerako.
Oso zaila izan zen, maila handia zegoen eta gure gusturako onak ziren taldeak atzera bota zituzten.
Eta finalean jotzea nolako esperientzia da?
Ez ginen urduri, finalerdian urduriago ginela esan daiteke. Aukerak, gogoak eta ilusioa genituen.
Gainera, 700 pertsonen aurrean jotzea eta hain areto berezian, ez dakigu berriro suertatuko den.
Hainbeste lan eta hirugarren izatea ez al da gogorra?
Epaileek finalean entzundakoaren arabera aukeratu zuten, 3. postua eman ziguten eta horrekin ados gaude. Esperientziak ikasteko balio izan digu.
Pop rock lehiaketan parte hartzeak ateak irekitzen al ditu?
Hirugarrenak izan ginen! Normalean taldeak mugitzen dira, ez dizute deitzen. Iazko irabazleek ere lekuak aurkitu behar dituztela entzun dugu.
Beraz, hemendik aurrera nola daukazue agenda?
Kontzertuak ditugu bihar Irungo Tunk! aretoan bat, eta urriaren 3an Durangon beste bat dugu baina oraindik baieztatzeko dago.
Tunk!-en Zortak taldearekin jotzen dugu. Ilusio handia egiten digu, rocker zaharrak eta musikari onak baitira.
Eta diska berria noizko?
Abesti berriak egin nahi ditugu, kontzertuek uzten diguten denboraren arabera noski.
Baina orain garrantzitsuena kontzertuak ematea da, diskoa mugitzea, gure izena ezaguta araztea. Madril, Bartzelona eta Zaragozara joateko asmoa dugu. Hemen leku gutxi dago eta gehienetan egon gara. Kanpora joan behar zara.
Hala ere, hurrengo diskoa osoa izatea espero dugu, hamabi abesti eta diskografikarekin. Diskografika handia edo txikia den berdin digu.
Honetaz gain, manager bila gabiltza. Orain arte, Iñigok egin du lan hori eta gogorra da, konpainia handietan egon da, kartelak jarri, lokaletara joan, etab.•
Plastic Lasarte-Oriako rock taldea dugu. Duela urte eta erdi sortu zen eta aurtengo Donostiako Pop rock lehiaketan parte hartu du hirugarren postua eskuratuz. Gainera, bere lehenengo diska taldeak berak ekoiztu du. Hau guztiaren eta etorkizunaren berri jakiteko taldeko kideekin batu gara.