Alpontxo eta armiarmak
Lasarteoriarrak "Isilka-mihisilka armiarmategian" lanaren nondik norakoak kontatu dizkigu. Hiru pertsonaien arteko harremanean oinarritzen da istorioa: Alpontxo, eta bi armiarma, bata arra eta bestea emea. Eskola utzi zuenetik lan egindakoa da Alpontxo, lana eta Rosalito emaztea ditu maitasun bakarrak; lana batez ere, Ehundegi batean egindakoa. Enpresaren lekualdatzea dela eta, lanik gabe geratuko da bat-batean, lanik eta Rosalitorik gabe. Urteetan sartuta, zaharkitua ikusten du bere burua eta hor hasiko da bere gainbehera. Ehundegia itxita, armiarmek hartuko dute beraientzat hutsik utzitako pabiloia. Halako batean, nolabaiteko gerra bat sortuko da Alpontxo eta armiarmen artean. Gerra horren jatorria eta kronika kontatzen dira obra honetan.
Idazleak lan honen bukaera aurreratu digun arren, ez dizuegu honen berririk emango.
Saria
Urriaren 31n bukatu zen Testu Dramatikoen Serantes Sariaren bederatzigarren ekitaldian lanak aurkezteko epea. 21 lan jaso ditu Serantes Kultur Aretoak eta horietatik bost euskaraz idatziak. Serantes antzerki lehiaketak garai batean bi atal zituen, euskarazkoa eta erdarazkoa, eta atal bakoitzari 2.000 eurotako saria zegokion. Duela hiruzpalau urtetik hona ez dago hizkuntzaren araberako bereizketarik; orain sari nagusi bat dago, 2.800 eurotakoa, eta akzesita, 1.200 eurotakoa. Pablok akzesita jaso du, lana aurki argitaratuko diote eta talderen batek taularatzeko asmoa agertzen badu Santurtziko Serantes Kultur Aretoak eszenara eramateko ekoizpena ahalbidetzeko modua eskainiko dio.•