PSE-EEk lortu du boto gehien Lasarte-Orian, alde handiz

PSE-EEk 3.816 boto eskuratu ditu Eusko Legebiltzarrerako hauteskundeetan; botoen %46,47a, alegia. Duela lau urte 3.655 botoren jabe egin zen PSE-EE Lasarte-Orian, eta beraz, gutxi bada ere gora egin du aurten. Gainontzeko alderdiei dagokienez, EAJk 2.092 boto lortu ditu (%25,47), PPk 991 (%12,07), Aralarrek 528 (%6,43), Ezker Batuak 279 (%3,40), EAk 226 (%2,75) eta UPyDk 175 (%2,13). Bestalde, 105 boto zuri izan dira (%1,15).
Baliogabetzat jotako botoak, aldiz, 817 boto izan dira; %8,97, alegia. Horietatik gehientsuenak legez kanpo utzitako Demokrazia Hiru Milioi alderdiarenak lirateke, duela lau urte 20 besterik ez baitziren izan baliogabetutako botoak.
Eusko Legebiltzarrerako aurreko hauteskundeetako emaitzekin alderatuta, abstentzioak gora egin du Lasarte-Orian. Aurten 5.141 lagunek erabaki dute botoa ez ematea, duela lau urte 4.895 izan ziren bitartean.

EAJ irabazle EAEn

EAEko datu orokorrei dagokienez, EAJk nabarmen irabazi ditu hauteskundeak, baina PSE-EEko Patxi Lopezek badu oraindik lehendakari izateko aukera.
EAJk 30 eserleku eskuratu ditu, PSE-EEk 24, PPk 13, Aralarrek 4, EAk 2 eta Ezker Batuak eta UPyDk bana. Horrenbestez, PSE-EE, PP eta UPyD elkartuko balira gehiengo absolutua izango lukete Eusko Legebiltzarrean, 38 eserlekurekin. Baliogabetutako botoak 100.000 inguru izan dira oro har; %8,8 alegia.
Parte-hartze orokorrari dagokionez, %65,88koa izan da. Duela lau urte %67,99koa izan zen.•