Ttakun Euskara elkarteak antolatu du Euskarazko Film Laburren emanaldia. Denetariko gaiak jorratzen dituzte, erdiak lau minututik beherakoak dira, laburrena bi minutu eta 45 segundokoa; luzeena, aldiz, 14 minutukoa da.
Aste honetan aurkeztu zirkuitua Topagunean Bilbon. Topaguneko bazkide diren elkarteak dira gero herriz herri filmeak eramango dituztenak. Lasarte-Oriara asteazkenean helduko da Ttakun-en eskutik. Seigarren aldiz antolatzen da zirkuitoa eta lehenengo aldiz Euskal Herritik kanpo ere erakutsiko dira zortzi film laburrak, Bartzelonan, Erroman, Parisen, Londresen eta Shanghain.
Talde lan ugari
Film laburren zuzendariei buruz, filmeen erdiak, taldean eginikoak dira, hiru unibertsitateko ikasle taldeek, arte eder, kazetaritza eta ikus-entzunezko komunikazioko ikasleek. Beste taldearen lana berezia da: Ander Odriozola, Iñaki Andonegi eta German Rubiok osatutako hirukoteak "Egiatik gezurrezko bizitzara" filmea hamar ordutan idatzi, ekoitzi eta zuzendu zuten Topagunearen kameratoia ekimenaren barruan.
Esperientziadunak
Besteei dagokionez, Iban del Campo arrasatearra eta Asier Urbieta oreretarra esperientzia duten zuzendariak dira, aurretik hainbat filma grabatuak dituzte.
Bestalde, Jose Luis Barredo eta Iñigo Garciak osatutako bikoteak ere hainbat proiektu gauzatu ditu elkarrekin euren zinerako zaletasuna bideratuz.
Azkenik Xabier Iñarrairaegi-Karlos Eriz bikotea 1994tik ari da elkarrekin Elorrioko IKB produktoran, dokumental, erreportaje eta publizitatea eginaz. Zirkuituan aurkezten dutena Torturaren Aurkako Taldeak ekoiztutakoa da eta torturatuak izan diren herritarrak agertzen dira.