Goizean, ikasle, irakasle eta gurasoak txirringan itzuli bat eman zuten. Gainera egun osoan, gurasoek umeek egindako eskulanak ikusteko aukera izan zuten.
Eguerdian Landaberri ikastolako anfiteatroan ikasleek Jon Lasa musika irakaslearekin batera emanaldi bikaina eskaini zuten. Hainbat taldek parte hartu zuten eta trikitilari edo txirularien laguntzarekin abesti, jolas eta dantza ugari eskaini zituzten ikastolako haurrek.
Bazkalostean giro ona
Bazkalostean, giro bikaina izan zen: batetik elkartu zirenak kantuan aritu ziren eta bestalde geroago erromeria izan zen.
Arratsaldean, DBHko ikasleek zenbait joko prestatu zituzten beste haurrentzat. Bestalde, arratsaldean beste ekitaldi bat burutu zen. Arratsaldeko emanaldian, batetik euskal dantzak eskaini zituzten ikasle txikienek eta gimnasia erritmikoan aritzen direnek ere urtean zehar ikasitakoa erakutsi zuten. Beste batzuek musean eta tokan aritu ziren.
Kanpoan lehen hezkuntzako 3., 4., 5. eta 6. mailakoek sorgin dantza eskaini zuten eta erromeriarekin amaitu zen Landaberri ikastolaren festa.