Otsailaren 15an, eta Lasarte-Oriako udaletxea eratu zeneko 24 urte beteko direla aprobetxatuz, Udalak ekitaldi bat egingo du "Terrorismoaren biktimei" izenpean, oroitzapen plaka bat jartzeko. "Euren sufrimendua aitortzea, biktimek izan duten arreta falta eta askatasunen defentsan izan duten paper garrantzitsua" aditzera ematea da udal gobernuaren asmoa.
PSOE, LOHP eta PPren botoei esker aurrera atera zen proposamena. Bestalde, EBko Ricardo Ortegak eta Jexux Izetak abstentzioaren bidea hartu zuten.
Testu eskasa
Bi politikari hauen ustez, testuak osatuagoa behar zuen. "Nire ustez iniziatiba positiboa bada ere, ez ditu biktima guztiak islatzen" adierazi zuen Ortegak.
"Ezin dira diktadurak eta faxismoak eragindako biktimak ahantzi, are eta gehiago trantzisio garaian hartutako neurriak direla medio hiltzaileak kalean daudenean" gaineratu zuen.
"Abstenitu egingo naiz errekonozimenduaren apartaduan GALen biktimak, zein diktaduran eta guda zibilean heriotza aurkitu zuten hainbat biktima kanpo geratzen direlako" adierazi zuen Izetak.
Askatasun Parkea
PSOEren proposamen honen hirugarren puntuan onartu zenez, Okendoko PERIan sortzen den parke berriari, hau da, Brigidatarren baratzak zirenetan kokatuta egongo den parkeari, terrorismoaren biktimak gogoratzeko Askatasun Parkea izena jarriko zaio.
"Terrorismoaren biktimekiko errespetu gisa, parke enblematikoa izango delakoan, oso izen egokia iruditu zaigu Askatsun Parkea" gaineratu zuen Iñaki Mugica, PSE-EE alderdiaren Udal Taldeko bozeramaileak.