LAB sindikatuak martxa honen bidez, eskualdeak ekonomikoki bizi duen egoera larria salatu nahi du. %65a ugaritu da langabezia eskualdean; 2008ko uztailean 2.582 langabetu ziren eta 2010eko otsailean 4.281; langabezia tasa %12,6koa da Buruntzaldean. Lasarte-Orian egoera are kaxkarragoa da. Ia ehunetik 85 ugaritu da, 720tik 1329ra eta langabetuak %15 dira. Andoain 576tik 1.006ra pasa da; Astigarraga 135etik 195ra; Hernani 762tik 1.144ra; Urnieta 212tik 303ra eta Usurbil 177tik 304ra.
Prentsaurrekoa
Datu hauek eta gaurko ibilaldia ezagutarazteko prentsaurrekoa eman zuten asteazken eguerdian Hernanin, Lurdes Eraso LABeko eskualdeko arduradunarekin batera, Lasarte-Oriako Jon Martin, Usurbilgo Josu Portu eta Hernaniko Jabi Hernandezek.
Bertan salatu zuten azken bi urteotan, krisi hotsak hasi zirenetik, erakundeak krisia sortu zuten banku eta espekulatzaile kapitalistak salbatu nahian ibili direla, hauek sortutako krisi hori langileak ordaintzen ari diren bitartean: langabezia, gizarte babesaren eta zerbitzu publikoen galerak, mixeria,... "Eta orain gure lan eskubideak berriz ere zokoratuko dituen lan merkatuaren erreforma inposatu nahi digute" zioten.
Alternatibak
Sindikatuaren ustez, eredu neoliberalak langileentzat alternatibarik eskaintzen ez badu ere, badago alternatiba, hain zuzen, "lanaren eta aberastasunaren banaketan oinarritutako eta langileok eraiki beharreko alternatiba".
Krisialdiari aurre egiteko kontuan izan beharreko lau ardatz aipatu zituzten LABeko ordezkariek prentsaurrekoan, euskal sektore publiko sendo eraginkor eta indartsuaren premia; lanaren banaketan oinarritutako enplegu estrategia orokorra; Babes Sozialerako sistema duina euskal pentsio sistema publikoaren alde eginez, eta azkenik langileek erabakietan parte hartzerik izan dezaten politika ekonomiko eta sozialak bertan erabaki daitezela.