40 de Fiebre rock taldeko Juan Mari Cerezoren omenez egingo den kontzertuan parte hartuko du herriko talde honek. 2003ko maiatzaren 12an Rekaldeko bidegurutzean auto istripuz hil zen gaztearen tokian Jabi Mora jarri eta 2000.ean argitaratu zuten maketako abestiak prestatu dituzte taldekideek biharko kontzerturako. Bittor eta Rafak musika alde batera utzita dute eta Unaik Dictadura taldean jotzen du. Hain juxtu talde hau da kontzertuan kanpoko talde bakarra. Beste guztiak Lasarte-Oriakoak dira, Bondi22, Zona Mortuoria, Despervicio, Obito, Gaueko Itzalak, Keep Digging, Lili&The Tomboys (batzuk Oztopon aritutakoak) eta baita Manu DJa ere. Gazteenek izan ezik, gehienek ezagutzen zuten Juan Mari gainera.
Baina Juan Mari Cerezoren omenezko II ekitaldian (lehenengoa 2004an heriotzaren urteurrenean burutu zen Okendon) dena ez da kontzertua izango, bere lagunek larunbatean egun osoko festa prestatu baitute. Omenaldiaren egitaraua gaur hastekoa zen Oreindik taldeak Jalgi tabernan eskaini behar zuen kontzertuarekin, baina bertan behera gelditu da. Hori bai, Jalgi tabernan, Juan Mari Cerezo eta 40 de Fiebre taldearen argazkien erakusketa zabalik dago hilabete honetan.