Arratsaldeko 17:30ean hasi zen finala hirugarren postua erabaki zuen partidaren ondoren. Finalistak eta epaileak txistulari eta dantzarien atzetik sartu ziren frontoian. Ondoren minutu bateko isilunea egin zuten Xabier Bardajiren oroimenez.
Hainbat urtetan txapelketako antolatzailea izan da Xabier Bardaji eta aurtengo txapelketa martxan zela hil da. Ondoren dantzariek agurra dantzatu zioten finalistei.
Faboritoak txapeldun
Oskar Lazkano eta Iñigo Arluziaga ziren faboritoak eta ez zuten hutsik egin. Hasieratik hartu zuten abantaila eta zazpigarren txapela eskuratu zuten. Azken zazpi urtetan bikote hau izan da nagusi Lasarte-Oriako pala txapelketan.
3. eta 4. posturako partida 16:30etan hasi zen eta ordu beteko lehia borrokatu eta parekatuaren ondoren amaiera bizia izan zuen. Bernaitz Odriozola eta Santi Martin, bikote gorria ia partida osoa aurretik joan zen eta soilik azken puntuetan hartu zuten aurrea urdinek. Partidari buelta eman zioten Iñaki Lizaso eta Joserra Alzibarrek eta 30-29 irabazi zuten.