Egitarauko ekitaldiak ahalik eta gehiena zaindu dituztela adierazi du Alkatetzak, "krisi ekonomikoa dela eta bizi dugun egoeraren ondorioz, nahi beste berritzerik izan ez badugu ere, egindakoa mimatzen saiatu gara. Horrela, helduen danborrada larunbatean jartzea erabaki genuen, ahalik eta herritar gehienek parte hartzeko aukera izan zezaten. Era berean, umeen danborrada igande goizera aldatzea erabaki genuen arrazoi berdinarengatik eta bero aurreikuspenenaren aurrean, haurrak ahalik eta erosoen izan zitezen ere bai".
Bestalde, alkateak goraipatu egin du "Lasarte Oriako herriak Brigitar Ama Agurgarriei egin dien omenaldia eta aitortza".
Langileei eskerrak
Era berean, batetik langileen ahalegina azpimarratu du Zaballosek, "bizitasun handiko egun hauetan langileek egindako zeregin eta ahalegina eskertu gabe ez dut utzi nahi" adierazi du eta herritarrak ere zoriondu ditu ez delako zoritxarreko gertakaririk izan: "Hiritarrei ere eskerrak, sanpedroetan ez delako ezustekorik izan. Honen harira, lerro hauek baliatu nahi ditut, Andoaingo patroiaren festatan bertako neska gazte batek jasandako erasoa gaitzesteko eta aldi berean, biktimaren sendiari elkartasuna adierazteko ere bai".
Barkamenak
Era berean, jaiek egun hauetan ezbehar edo eragozpenen bat sortarazi dien pertsona guztiei barkamenak eskatuz eta hurrengo urteko sanpedroak aurtengoak bezain onak edo hobeak izan daitezela opatuz bukatzen du alkatetzak jaien balorapena: "Jada prestatzen ari garen 2011ko sanpedroak aurtengoen berdinak edo oraindik hobeak izango direla espero dut" dio bukatzeko Jesus Maria Zaballos alkateak.