Aterpea merkatarien elkarteak, Deco 42 tapicerías dendak, Eztiphoto estudioak, Labe-goxo okindegiak, Michelin kontsumo kooperatibak eta Lasarte Parafarmaziak euskara plangintza integrala jarri dute abian. Lagunak elektrizitate dendak eta Xule fisioterapia zentroak aldiz ziurtagiriaren hitzarmena sinatu dute. 2010eko plangintza eta ziurtagiriak sinatzeko ekitaldia asteazkenean egin zen kultur etxean eta Iñaki Mugica Euskara Batzordeko lehendakari bezala estreinatu zen.
“Euskararekin, zeu irabazle” leloa darabil Udalak aspalditik eta horixe da euskara plangintzak martxan jartzearen abiapuntua. Mezuarekin bat egin eta zerbitzua euskaraz ere emanaz bezero batzuen aitorpen eta esker ona jasotzen dutela. Asteazkenean Kultur Etxean euskararen erabileraren aldeko hitzarmena sinatu zutenak kontuan izanik, guztira 67 establezimendu eta enpresa dira Lasarte-Orian euskara plana daukatenak.
Batzuk euskaraz zerbitzua ematen hasteko bidean jarri dira eta besteak jada zerbitzu osoa euskaraz emateko gai direnez, Euskara Ziurtagiria erregulatzeko hitzarmena sinatu zuten.