Ormazabal familiaren Lizarriturri-enea 2007ko maiatzaren 21an eraitsi zenean, Lasarte-Oriaren parte bat bota zen berarekin. Jende ugarik ezagutu du edifizio hori. Bertan lokal komertzialak zeuden “espartigintza bat, mertzeria, oihal denda, gasolindegi bat eta nire aitona eta amak eramaten zuten taberna” azaltzen digu Arantxak.
Tabernak lorategi batera zeukan sarbidea, Kale Nagusia eta Goikale kalea elkartzen diren puntuan, eta hor Ormazabal anaiak akordeoia jotzen zuten “dantzaldiak ere antolatzen ziren” gaineratzen du. Familia berak eramaten zituen negozio guztiak, arazo urbanistiko eta sarbide arazoak sortu arte “gasolindegia etxebizitzetatik oso hurbil zegoen, hiri-barneko zoruan eta bota beharra zegoen” adierazi digu Iñakik.