Urtero bezala, talde asko atera ziren herriko kaleetan zehar zein baserrietan, abestera.
Goiztiarrenak Zabaleta Auzokoak izan ziren, goizeko 10:00etan abiatu ziren kaxkabarra zapar baten ondoren. Gero Landaberri ikastolakoak, Naximentuaren lagunak... Ogi Berri okindegiko Olentzero ere Lasarte-Oriara etorri zen madalen goxoak banatzera.
Arratsaldean ere beste talde batzuk animatu ziren; Erketzeko kideak baserrietara joan ziren, Alboka abesbatzakoak Atsobakarren hasi ziren gero erdigunera joateko asmoz. Ttakunek Olentzerori ongi-etorria emateko antolatu zuen jaialdia Andatza plazan izan zen eta lagun asko bildu zituen: Xixuko, Jalguneko lagunak, Amaraun ludotekakoak, Amalurreko trikitilari eta pandero joleak, Porrotx, Pupu eta Lore... Gainera Andatza plazara hurbildutako haurrek Olentzerori gutuna emateko aukera izan zuten.