Goizean goiz
Goiztiarrenak Zabaleta Auzokoak izan ziren, goizeko 10:00etan abiatu ziren kazkabar zaparrada baten ondoren herriko kaleak euren doinuekin alaitzeko.
Gero Landaberri ikastolako haurrak ikusi genituen herrian zehar Olentzeroren laguntzaz giroa berotzen.
Naximentuaren lagunak taldekoek ere ez zioten urteroko zitari huts egin: euren jaiotza kaleetan zehar erakutsiz kantuan ikusi genituen goizean zehar eguraldi euritsuari aurre eginez.
Olentzero Ogi Berri okindegiko furgoneta zaharrean etorri zen Lasarte-Oriara. Madalena goxoak banatu zituen hurbildu ziren guztien artean. Gainera, antzinako garaietako ibilgailuan agertu eta bertan ibili zen goiz guztian zehar.
Kantuari eutsiz
Arratsaldean ez zen Gabon giroa apaldu Lasarte-Orian, eta ohiko beste talde batzuk ibili ziren kaleetan zehar. Eguraldi aldakorrari eta hotzari aurre eginez giroa berotzen aritu ziren hainbat talde.
Erketzeko kideak, aldiz, baserrietara jo zuten Gabon kantak herriko kaleetatik urrun bizi direnei eskaintzeko asmotan.
Alboka abesbatzakoak ere kantuan aritu ziren Eguberri bezperan. Atsobakarren hasi ziren gero erdigunera eginez.
Gazteak animatuak
Ohiko taldeez gain gazte koadrila batzuk ere ikusi genituen herriko kaleetan kantuan eta dantzan. Guztiak baserritarrez jantzita Gabonei ongi etorria emateko.
Euria eta hotza albo batera utzita, herritar asko ibili zen erdiguneko kale eta tabernetan gabon eguneko eta lagunarteko giroaz gozatzen.
Eguerditik aurrera herriko kale eta tabernak jendez bete ziren. Baina arratsalde-gau partean, guztiok barneratu ginen familia giroan urtero bezala, txintxo txintxo, herriko kaleak hustu eta familiarekin afaltzeko etxera abiatuz. Gauerditik aurrera berriro, ere festa izan zen nagusi herriko kaleetan.